Exemplary Cebuana(for midterms) "Maestrang Gimahal "

Ang kabaskug sa panglawas wala sa edad. Mao kini akong nakita ug nakatunan sa akong pakigstorya kay Gng. Aurelia Sumile.

Si Madame usa ka tinuod nga tubong Cebuana sukad sa pagkabata hantod karon nga aduna na siyay pamilya. Wala siyay plano mubiya sa Sugbo mahitungod nga dinhi siya natawo maong dinhi pud niya gipili ihatag tanan niyang serbisyo.

Si Madame Sumile usa ka maestra sa St. Theresa's College. Traynta Siete katuig na siyang nagtudlo ug nahimung ikaduhang inahan sa iyang mga studyante. Sa edad nga saisinta uno anyos, baskug ug aktibo pa si madame. Matod pa niya, " alive and kicking" pa kaayo siya. Sa walay dapig-dapig, batan-on pa tinuod tanawon si madame. Aduna pay porma ug nilihukan nga murag dili gayud saisintay uno. Pirme lang nimu siya makitan nga magngisi ug magtabi sa maski kinsa niyang malabyan. Ehemplo si madame sa kadaghanan hilabi na sa iyang mga studyanteng iyang natabangan. Saksi ko sa kung unsa nga klaseng maestra si Madame Sumile ug makaingon ko nga labaw pa sa pagtudlo ang iyang gugma sa iyang mga sakop ug sa iyang propesyon. Para niya, ang pagkatun sa usa ka studyante dili masukod sa kataas sa mga grado ug sa mga leksyon nga iyang gipangyawyaw kung dili masukod lang kini sa kantidad sa nasabtang saktong pamatasan para magamit nila inig puhon-puhong sila napud ang mahimung maestra. Mailhan lang kung nasabtan sa studyante iyang tumong kung ginagamit kini sa pangadlaw adlaw nga kinabuhi. Si Madame nagtudlo ug education, Filipino, ug Values Education subjects sa pipila na katuig. Dako nalang akong kakurat ug pagkahibung nga accountancy gyud diay unta to iyang ganahan nga kurso. Nagdamgo siya nga mahimung usa ka certified public accountant pero sa kakuwang sa kwarta, napugos siya mageducation nalang kung diin nahasa ug napurma ang iyang interes ug pagmahal sa pagtudlo. Wala niya gikauwaw nga siya usa ka produkto ug public school. Gikan elementarya hantud kolehiyo, public nga skwelahan ra gyud daw siya nagskwela tungod sa kalisud sa kinabuhi sa ilang pamilya tunguna.

Mura pud ug teleserye sa TV ang kinabuhi ni Madame kung diin dako ang iyang garbo nga naagian niya tanang klase sa kalisud. Kay matod pa niya, ang tanan niyang naagian nga kasakit ug pitos sa kinabuhi ang nakatabang ug dako sa iya para makabot niya kung unsa siya ug naa niya karon.

Dako ang pasalamat ni Madame sa Ginoo nga sa iyang pangidaran karon, nakabot na niya ang iyang gustong makabot sa kinabuhi. Sa edad nga 61, kontento na siya sa iyang panginabuhi kuyog iyang bana, anak, ug mga ikaduhang anak. Kung naa man gani kunoy kuwang, mao kini ang makitan niya iyang bugtong nga anak makagradwar sa kolehiyo. Bilib ko sa iyang determinasyon ug kadasig sa iyang propesyon hilabi na sa pagpaabot sa iyang mga studyante sa paghatag ug dakong importasya sa dialektong Cebuano. Usa siya ka Filipino teacher nga nagtabang ug preserbar hantod sa iyang makaya ang dialekto natong mga Pilipino. Iyang ginapamata ang katawhan pinaagi sa iyang tinudluan nga angay natong paga-ampingan atong kultura ug dialekto kay kini usa ka sagradong tatak samut na natong mga Sugbuanon.

Sa dinhang gipangutana kung hantod kanusa siya magpadayon ug tudlo ug kung wala ba siyay plano muundang, usa lang ang tubag ni Madame. Ug kini ang dili siya mu undang hantod kailangan pa ang iyang serbisyo ug kaya pa sa iyang lawas. Dili sayon, dili dali, pero para sa usa ka tao nga andam ihatag ang iyang kinabuhi alang sa uban, sayun ug dali ra kini. Niya nako napatinudan nga kung naa gyud imung kasingkasing ug gugma sa imung ginabuhat, maski unsa pay mahitabo, dili gyud ka mawad-an ug interes niini.

Tinuod nga dili lalim ang kinabuhi sa usa ka mangtutudlo. Angay gayud sila hatagan ug dakong pasalamat alang sa serbisyo ug sakripisyo nga ilang gidalit sa katawhan. Angay silang tawagong bayani kay kung dili tungod nila, walay dagkong tao karun ang niasenso. Sama ni Madame Aurelia Sumile, sila ang klase sa mga maestrang magbilin gyud ug tatak sa kinabuhi sa ilang mga studyantye. Dili masukod nga kalipay ang ilang mabati sa dinhang naay mga higayon nga makitan nilang tagas ug maabtan ilang mga ikaduhang anak matapos ang pila katuig nga paghashas sa ila. Mao kini ang pinakadakong medalya nga ilang madawat sa dinhang ilang mahibawan nga wala nasayang ilang kahago ug pagsabot sa pagtudlo kanato. Saludo ko sa atong mga maestra ug mahimo untang inspirasyon ang storya ni Madame Sumile sa mga kabatanonang naglantaw makatilaw ug kahimtang sa kinabuhi samtang nagtabang sa uban.

Mabuhi ang mga maestra ug mabuhi ang Sugbuanon!