Simanang Talaan: "Kanusa pa kaha?"

Dako akong kalipay nga wala na nisukwahi ang akong panglawas karong simanaha. Nakahungaw na pud akong kasing kasing sa kakulba ug akong utok sa cigeg tuon kay humana gyud amung midterms. Kaluoy sa Diyos, nakatubag ug gisayunan ra ko sa amung mga exams.

Nindut ang dagan sa akong mga adlaw karong simanaha hilabi na nga nakabisita akong pinangang inahan dire sa Sugbo. Wala mi giusik nga panahon para dili kumustahon ang isig usa. Pag Sabado sa hapon, human sa akong klase sa Com 26, nideretso mi ug laag sa SM. Nanuroy ug nananaw mi ug sine. Gikumusta niya akong pagskwela ug gikumusta pud nako siya sa amung negosyo ug sa iyang kinabuhi didto sa Bohol nga wala ko. Suod mi sa akong mama ug kami ra gyud na duha magtinabangay kung aduna mi mga problema. Karun ra nahitabo nga nagkalayo mi sukad sa akong pagkabata. Mas ganahan unta ko nga sa Bohol ra muskwela para dili nako mabyaan akong mama pero mas gusto niya ihatag nako ang nindut nga edukasyon maong mas gipalabi niya akong kaugmaun pinaagi sa pagtugot nga dire ko sa Cebu magkolehiyo. Sa amung kasuod, dili pud ko makaingun nga pirme mi magkasinabot. Naay daghang higayun nga maglalis mi sa akong mama tungod sa mga butang nga di niya mauyonan. Mas magkasinabot mi ug pangutok sa akong papa pero mas nasuod ug nagdako ko sa akong mama. Isip usa ka "unika ija", kasabot man ko sa kahugot sa pagdisiplina nila nako pero masubraan lang gyud usahay. Samut na akong mama! Sa tanang butang nga dili namu makasinabtan, ang pagsalig gyud amung
kalalisan. Daghan ra kaayo siya ug bawal sa ako. Bawal magbarkada, bawal maglaag, bawal dugay muuli, ug labaw sa tanan ang bawal manguyab. Kabalo ko nga natural sa usa ka inahan ang buhaton tanan para sa ikamaayo sa iyang anak pero para nako taphaw ug mabaw ra man ang iyang mga rason nganung iya kong bawalan. Dili siya ganahan nga mapareho ko niya nga nabuntis ug sayo ug wala nagkadimao ang kinabuhi. Ang ako lang pud unta, nganung buhaton paman nako iyang mga sayup kung kita nako sa mga epekti niini. Ganahan lang unta ko musalig sita nako ug iya kung tanawon isip usa ka anak nga naay bugat nga pagtuo. Dili man pud ko ang klase sa pagkababae nga magpadala ug barkada samut na sa uyab. Karun nga aduna nakoy hinigugma, maglisud ko ug ingun niya kay magsugod palang ko magwali na akong inahan. Ganahan na unta ko musulti niya para wala nakoy ginatago pero dili man gyud itugot sa panahon. Tanawon nalang ni kung hantud asa nako kutob matago ang amung relasyon sa akong kaugalingon nga inahan.

Kanusa pa kaha muabot ang panahon nga masabtab ko niya? Pero samtang dili pa, sabton nalang nako kung unsa man gani iyang rason kay maski unsa pay mahitabo, siya gihapon akong inahan. Akong inahan nga nagpadako ug akong labing gimahal.