Simanang Talaan: "Gubot nga simana"

Wala ko kasabot sa akong pamati karong simanaha. Buot nako maayo para makabuhat sa akong mga buhatunon ug responsibilidad isip usa ka studyante, pero ang akong lawas musupak gayud. Dumingo palang sa buntag, lain na akong paminaw. Nagsakit akong tiyan sa di masabtang rason. Mura kog gikabuhi ug walay umoy akong tibuok kaunuran. Pero maski unsa pa kalian akong lawas, ako gyud gipugos nga muskwela pag Lunes. Wala nalang nako hunahuna-a ang sakit para dili maapektuhan akong pagskwela samut na nga daghan mi dapat lampuson para sa midterms sunod simana.

Ikaduhang adlaw sa akong simana, gihilantan ko. Tungod sa kataas sa akong temperatura, wala nako nisud ug klase kay di gayud ko makabangun sa katre sa kaluya. Sa akong paningkamut nga mawala akong hilanat, nakasud nako ug klase pagmiyerkules. Pero murag nagsunod gyud ang malas sa ako kay mao pay pagka ayo nako, laing problema napud akong giatubang.

Ako usa ka officer sa among organization sa Mass Communication ug isip usa ka auditor sa org., nasayud ko sa akong responsibilidad sa ubang tao ug sa akong kauban nga mga officers. Nalain ug nahiubos lang ko sa gipangingun sa usa ka tao nga taas pa naman unta akong paglantaw ug respeto. Iyang gikwestyon ang akong serbisyo kung diin wala naman unta koy laing gibuhat kungdi mutuo ug buhaton iyang gipangsugo maski layo ra kini sa akong trabaho isip usa ka auditor. Tanawon sa unta niya iyang kaugalingon usa siya manghinaway sa uban. Wala nako ganahi sa mga panghitabo ug sa batasan sa akong mga kuyog nga nakaapekto sa akong panglantaw sa org. Ako ang klase sa pagkababae nga nagatuo nga kung ikaw usa ka suluguon sa ubang tao, dapat dako imung pagsalig sa kapasidad anang tawhana. Wala koy plano iingun ang akong gibati sa iyaha kay kabalo ko nga dakong gubot lang ang mahitabo maong buhaton nalang nako tanang pwede nakong matabang taman sa akong makaya para ipakita sa iyaha nga dili ako ang klase sa tao nga iyang gipanghinabi. Kung wala siya makontento sa akong gipangbuhat, lunuron nako siya ug produkto sa akong pagsakripisyo isip usa ka officer arun makita niya iyang pagkuwang ug kawalay kusog nga muatubang sa iyang mga sayup.

Naghinaot ko nga mawala ra kini tanang problema ug mubalik na sa hapsay ang akung pangutok sunod simana kay ug dili man gani, wala ko kabalo ug asa ra kutob akong makaya.